ស្ពានអាកាសនៅចោមចៅ នឹងបើកការដ្ឋានសង់នៅខែមេសានេះហើយ!

នាអំឡុងពិធីបុណ្យចូលឆ្នាំខ្មែរគម្រោង ស្ពានអាកាស និង ផ្លូវក្រោមដី ដែលស្ថិត​នៅរង្វង់​មូល​ចោមចៅ នឹងត្រូវ​បើកការ​ដ្ឋាន​សាងសង់​ហើយ នេះបើតាមការអះអាងពីមន្ត្រីនាំពាក្យសាលារាជធានីភ្នំពេញ ដែលបានថ្លែងប្រាប់ខេមបូណូមីសកាលពីពេលថ្មីៗនេះ។ ការសម្រេចនេះ គឺបន្ទាប់ពីមានកិច្ចប្រជុំមួយរបស់សាលារាជធានីភ្នំពេញ កាលពីថ្ងៃទី១៤ ខែកុម្ភៈកន្លងទៅ។

នេះជាប្លង់ស្ពានអាកាស និង ផ្លូវក្រោមដីរង្វង់មូលចោមចៅ (រូបថត៖ ហ្វេសប៊ុក រដ្ឋបាលរាជធានីភ្នំពេញ)

យ៉ាងណាក៏ដោយ លោក ម៉េត មាសភក្ដី អ្នកនាំពាក្យសាលារាជធានីភ្នំពេញ មិនអាចបញ្ជាក់ពីទំហំទឹកប្រាក់ចំណាយនិងកាលបរិច្ឆេទនៃការបញ្ចប់គម្រោងសាងសង់ស្ពានអាកាសនេះបាននៅឡើយទេ ដោយគ្រាន់តែបញ្ជាក់ថា មុនការសម្រេចនេះ សាលារាជធានី​ភ្នំពេញ បានបង្កើតជម្រើសចំនួន​៧ប្លង់ ប៉ុន្តែ សាលារាជធានីភ្នំពេញ ដែលសហការជាមួយអគ្គីសនីកម្ពុជា និង រដ្ឋាករទឹក បានជ្រើសរើសប្លង់មួយ ដែលមានផលប៉ះពាល់តិចបំផុត។លោកបញ្ជាក់យ៉ាងដូច្នេះថា៖ «មូលហេតុនៃការសាងសង់នេះ គឺដើម្បីកាត់បន្ថយការកកស្ទះចរាចរណ៍ ព្រោះសេដ្ឋកិច្ចប្រជាជនមានការកើនឡើង ដែលជំរុញឲ្យមានកំណើនប្រជាជន និងកំណើនយានយន្តនៅលើដងផ្លូវ។

ជាក់ស្តែង រង្វង់មូលចោមចៅ មិនថាម៉ោងណានោះទេ តែងតែមានការកកស្ទះចរាចរណ៍ បើទោះបីយើងបានដាក់សមត្ថកិច្ចសម្រួលចរាចរណ៍ជាច្រើនកន្លែងក៏ដោយ។ ដូច្នេះ ទើបសាលារាជធានី បានស្នើសុំរដ្ឋាភិបាលសង់ស្ពានអាកាស និងផ្លូវក្រោមដីនៅរង្វង់មូលចោមចៅនេះ»។

សូមបញ្ជាក់ថា ក្នុងបុព្វហេតុកាត់បន្ថយការកកស្ទះចរាចរណ៍ សាលារាជធានីភ្នំពេញ បានកសាងស្ពានអាកាសបានចំនួន៤ ដូចជា ស្ពានអាកាសស្ទឹងមានជ័យ ស្ពានអាកាស៧មករា ស្ពាន​អាកាស​៥មករា (ស្ពានអាកាសតិចណូ) ស្ពានអាកាសក្បាលថ្នល់ និងគ្រោងសម្ភោធស្ពានអាកាសដីហុយក្នុងពេលឆាប់ៗនេះផងដែរ៕